၈၈ မျိုးဆက်ကျောင်းသားများအဖွဲ့မှ အဖွဲ့ဝင် ကိုမျိုးသန့်၏အစ်မဖြစ်သူ
ပဲခူးတိုင်း၊ ကြို့ပင်ကောက်မြို့မှ မမာမာအေးကို စစ်အစိုးရက ယနေ့
ပေါင်းတည်ထောင်တွင် ရုံးထုတ်စစ်ဆေးခဲ့သည်။
အသက် (၄၆) နှစ်ရှိပြီဖြစ်သော မမာမာအေးကို ယခုလ (၁၅) ရက်နေ့၊ ညနေတွင်
ရဲတပ်ဖွဲ့ဝင်များက နေအိမ်မှ အကြောင်းပြချက်မရှိဘဲ
ဖမ်းဆီးခေါ်ဆောင်သွားခဲ့ပြီးနောက် ယခုကဲ့သို့ တရားရုံးထုတ်
စစ်ဆေးနေခြင်းဖြစ်သည်။
“ဒုရဲအုပ် ကျော်စိုးနဲ့ ရဲမေ နီနီမာတို့က မယကဥက္ကဌက ခေါ်ခိုင်းတယ်ဆိုပြီး
ခေါ်သွားတာ။ အ၀တ်အစားတွေယူ မယ်ဆိုတာတောင် ညနေ (၆) နာရီမှာ
ပြန်ပို့ပေးမယ်လို့ ပြောတယ်။ နောက်နေ့လည်းကျရော အိမ်ကိုဝင်ရှာတာပဲ။
အဲ့ဒီမှာ (NO) အမှတ်အသားပါတဲ့ တီရှပ်သုံးထည်၊ ကြက်ခြေခတ်ပါတဲ့
တီရှပ်ကတထည်၊ နောက် ကုလသမဂ္ဂကထုတ်တဲ့ လူ့အခွင့်အရေးစာအုပ်တွေနဲ့
ဒေါ်အောင်ဆန်းစုကြည်ပုံပါတဲ့ တီရှပ်နှစ်ထည်ကို သိမ်းသွားတယ်” ဟု
မိသားစုနှင့်နီးစပ်သူက ပြောသည်။
ထိုနောက် မမာမာအေးကို (၁၇) ရက်နေ့တွင် ကြို့ပင်ကောက်တရားရုံး၌
ရုံးထုတ်စစ်ဆေးခဲ့ရာ မိသားစုကပင် မသိရှိလိုက်ဘဲ ပေါင်းတည်အကျဉ်းထောင်သို့
ပို့ဆောင်ခဲ့သည်ဟု ၎င်းက ဆက်လက်ပြောဆိုသည်။
မိသားစုဝင်များက အဆိုပါ ပေါင်းတည်ထောင်သို့ ယခုလ (၂၂) ရက်နေ့တွင်
လိုက်သွားခဲ့သော်လည်း မမာမာအေးနှင့် တွေ့ခွင့်မရဘဲ နောက်တနေ့ (၂၃)
ရက်နေ့မှ တွေ့ခွင့်ရကာ အစားအသောက်နှင့် ပစ္စည်းအချို့ ပေးနိုင်ခဲ့သည်။
“သူ့ကိုဖမ်းတာက သံဃာတပါးကနေပြီးတော့ အဲ့ဒီ (၁၁) ရက်နေ့မှာ ဒေါ်မာမာအေးကို
လ္ဘက်ရည်ဆိုင်က လှမ်းခေါ်လို့ သွားပြီး စကားပြောတာကို ရဲကတွေ့ပြီး
မသင်္ကာတာနဲ့ (၁၅) ရက်နေ့ညနေကျတော့ အိမ်မှာ လာဖမ်းသွားတာပဲ” ဟု
မျက်မြင်သက်သေတဦးက ပြောသည်။
ဒေါ်အောင်ဆန်းစုကြည်အား တရားစွဲဆိုထားသည့်အမှုအား စီရင်ချက်ချမည့် ယခုလ
(၁၁) ရက်နေ့တွင် ကြို့ပင်ကောက်မြို့ပေါ်တွင် လုံခြုံရေးများ
အထူးတင်းကြပ်စွာ ချထားခဲ့ပြီး သံဃာတော်များအား
စောင့်ကြည့်မှုများရှိခဲ့သည်ဟု ဒေသခံတဦးက ပြောဆိုသည်။
ယနေ့ရုံးထုတ်ရက်တွင် မိသားစုနှင့်ဆက်သွယ်ခဲ့သူက “မမာမာအေးကို
နိုင်ငံတော်အကြည်ညိုပျက်စေမှု ပုဒ်မ (၅၀၅) နဲ့ တရားစွဲဆိုထားတာ၊ လာမဲ့
သောကြာ (၂၈) ရက်နေ့ကို ရုံးချိန်းထပ်ပေးထားတယ်၊ တရားရုံးက မမာမာအေးကို
ဘုန်းကြီးတွေနဲ့ ဆက်သွယ်သလားလို့မေးတယ်” ဟု ပြန်လည်ပြောပြသည်။
စစ်အစိုးရအနေဖြင့် ဒေါ်အောင်ဆန်းစုကြည် လွတ်မြောက်ရေးလှုပ်ရှားမှုနှင့်
သံဃာ့လှုပ်ရှားမှုများ ဖြစ်ပေါ်လာမည်ကို ယခုကာလအတွင်း
အလွန်စိုးရိမ်မှုရှိနေပြီး လုံခြုံရေးများ တင်းကြပ်ထားကာ
ဖမ်းဆီးအရေးယူမှုများလည်း ဆက်တိုက်ဆိုသလို ပြုလုပ်နေလျက်ရှိသည်။
No comments:
Post a Comment