နာရေးကူညီမှုအသင်း(ရန်ကုန်) အသင်းသူ/သားများ၊ ၀န်ထမ်းများသည် ပြည်မြို့ ရွှေပေါက်ပင်တောရကျောင်းတိုက် ဆရာတော်ကြီး၏ အကျွတ်အလွတ် အဓိဋ္ဌာန်ကျင့်စဉ်အား ၄.၁၀.၂၀၁၁ ရက်နေ့မှ ၁၂.၁၀.၂၀၁၁ သီတင်းကျွတ်လပြည့်နေ့အထိ (၉) ရက်တိုင်တိုင် အားထုတ်ကျင့်ကြံမှုများကျင်းပပြီးစီးသွားပြီဖြစ်ပါ၍ ၁၄.၁၀.၂၀၁၁ သောကြာနေ့ ညနေ (၆း၀၀) နာရီအချိန်တွင် ပြည်မြို့မှ ရွှေပေါက်ပင်ဆရာတော် ဘဒ္ဒန္တ သောမစာရကိုယ်တိုင်ကြွရောက်လာပြီးနာရေးကူညီမှုအသင်း(ရန်ကုန်)၌ ညအိပ် သီတင်းသုံးကာ ၁၅.၁၀.၂၀၁၁ စနေနေ့ နံနက် (၅း၃၀) နာရီအချိန်တွင် မြတ်စွာဘုရားရှင်အားရည်စူး၍ သစ်သီး၊ ရေချမ်း၊ ဆီမီး၊ ပန်း၊ နံ့သာတို့ဖြင့် ပူဇော် ဆက်ကပ်ကာအရပ် (၁၀) မျက်နှာတို့အားမေတ္တာပို့သခြင်းကို ပြုလုပ်ပြီးနောက် ရွှေပေါက်ပင် ဆရာတော်ကြီးအားအာရုံဆွမ်းဆက်ကပ်ခဲ့သည်။
နံနက် (၈း၃၀) နာရီအချိန်တွင် နာရေးကူညီမှုအသင်း(ရန်ကုန်)ရှိ နိဗ္ဗာန်မော်တော်ယာဉ် များအား အန္တရာယ်ကင်းမေတ္တာပို့ဆုတောင်းခြင်းကို ပြုလုပ်ပေးကာ ရွှေပေါက်ပင်ဆရာတော်ကြီးအားအသင်းသူ/သားများ၊ ၀န်ထမ်းများ၊ သုခကုသိုလ်ဖြစ်ဆေးခန်းသို့ လာရောက်ကုသကြသောလူနာများ၊ လူနာရှင်များနှင့် ဆရာတော်ကြီး၏ တပည့် ဒါယကာဒါယကာမများမှ သက်သတ်လွတ် အကျွတ်အလွတ် ဆွမ်းလောင်းလှူပွဲအားစည်ကားစွာကျင်းပခဲ့သည်။ လောင်းလှူထားသောသက်သတ်လွတ် ဆွမ်းများအားဆရာတော်ကြီးမှ မြတ်စွာဘုရားရှင်အားဆက်ကပ်လှူဒါန်းပြီးနောက် ဆရာတော်ကြီးအားဆွမ်းဆက်ကပ်လှူဒါန်းခဲ့သည်။ ထို့နောက် ကြွရောက်လာကြသောဧည့်ပရိသတ်အပေါင်းတို့ကိုဆရာတော်ကြီးမှ သက်သတ်လွတ် ဆွမ်းပေါင်းဖြင့် ကိုယ်တိုင်ခူးခတ် ကာကျွေးမွေးခြင်းနှင့် လှူဒါန်းထားသောသစ်သီးများ၊ မုန့်များတို့အား အန္တရာယ်ကင်းကုသိုလ်ဖြစ် တဆင့် ပြန်လည်ဝေငှခဲ့ပါသည်။
နာရေးကူညီမှုအသင်း(ရန်ကုန်)တွင် ယခုကဲ့သို့ ကုသိုလ်ကောင်းမှုပွဲတော်များ၊ အခမ်းအနားများ၊ စာပေဟောပြောပွဲများ၊ ဂုဏ်ပြုပွဲများစသည့် လှုပ်ရှားမှုတိုင်းတွင် လုပ်အားပေးအသင်းသူ/သားများ၊ ၀န်ထမ်းများမှ မခိုမကပ် အင်တိုက်အားတိုက် စည်းလုံးညီညွတ်စွာလာရောက် ပေးဆပ်မှုများသည် လူမှုရေးပရဟိတလောကအတွက် အလားအလာကောင်းသော၊ မင်္ဂလာရှိသောအတိတ်နိမိတ်များပင် ဖြစ်တော့သည်။
No comments:
Post a Comment