ကိုဗလိုင် (ခ) အောင်စိုး
ငါ့မြေး....အဖွါးတို့ရွာမှာ
ငါ့မြေး....အဖွါးတို့ရွာမှာ
မော်တော်ကားနဲ့ ထွန်ယက်စိုက်ပျိုးဖို့
တဂျုံးဂျုံးမည်တဲ့ စက်တပ်ယာဉ်တွေမလိုအပ်ပါဘူး၊
ဒီလက်နှစ်ဖက်နဲ့ အိမ်အောက်ကနွားနှစ်ကောင်
လယ်တောမြေကို ထွန်ယက်နိူင်ပြီး...
ဟိုဘက်ရွာနဲ့ ဒီဘက်ရွာကို
ဖိနပ်ဗလာနဲ့ ထီးမကူပဲ
ဒီခြေနှစ်ဖက်က လျှောက်လှမ်းလို့ နိူင်ပါသေးတယ်။
ငါ့မြေ....အဖွါးတို့ရွာမှာ
ဓါတ်စက်နဲ့ရုပ်ရှင် ပြဖို့မလိုပါဘူး၊
နေ့ခင်းနေ့ဘက် အလွမ်းပြေ ပုံပြင်နဲ့
ငါ့မြေးအိပ့်အောင်
ညအိပ့်ရာပုံပြင်တွေကို အဖွါးပြောဆိုလို့ နိူင်ပါသေးတယ်။
ငါ့မြေး....အဖွါးတို့ရွာမှာ
ဘဲကင် ဘဲပေါင်း
ဝက်ကင် ဝက်ပေါင်း
ကြက်ကြော် ကြက်ကင် ဒါတွေမလိုပါဘူး၊
မနက်- အာရုဏ်ရောက်ရင်
ပဲပြုတ်ဆားဖြန်း ထမင်းကြမ်းခဲနဲ့
ငါးပိရည်ရှိရင် လုံလောက်ပါတယ်။
ငါ့မြေး....အဖွါးတို့ရွာမှာ
ရုံးတွေ ဂတ်တွေ
ရှေ့နေ တရားရုံး ဒါတွေမလိုဘူး၊
အဖွါးတို့ရွာမှာ သမာဓိရှိတဲ့
ရွာသူကြီး တစ်ယောက်ဆို လုံလောက်ပါတယ်။
ငါ့မြေး....အဖွါးတို့ရွာမှာ
အကြင်နာတရားနဲ့ မေတ္တာတရား ပေါကြွယ်ဝတယ်၊
ဒါကြောင့်....
လူ့အခွင့်အရေးတွေ ရှင်သန်နေတယ်၊
ဒါပေမယ့်....လူသတ် စစ်လက်နက်ပုခုံးထမ်း
မိစ္ဆာလူရမ်းကားတွေ
ဒို့- ကျေးရွာထဲမှာ ခြေဂွင်ရှုပ်ပြီး
အဝင်အထွက် မလုပ်ဖို့ပဲအရေးကြီးတယ်။
ငါ့မြေး...နောက်ဆုံးစကား
တရွာလုံးရဲ့ကိုယ်စား အဖွါး-ပြောလိုက်ပါရစေ...
တရေထဲသောက်ပြီး တမြေထဲနေသူတွေ
လူလူချင်း နှိပ်စက်ချင်း
အမြဲထာဝရ ကင်းဝေးကြပါစေ..။။
No comments:
Post a Comment