နိုဝင်ဘာ ၄ ရက်နေ့စွဲနဲ့ နိုင်ငံရေးပါတီများ မှတ်ပုံတင်ခြင်းဥပဒေကို ပြင်ဆင်တဲ့ ဥပဒေထွက်လာတယ်။ ၂၀၀၈ အခြေခံဥပဒေကို လေးစားလိုက်နာရေးဆိုတဲ့စကားရပ်ကို ပြောင်းလဲသုံးစွဲတယ်။ အနည်းဆုံး ကြားဖြတ်ရွေးကောက်ပွဲမှာ အနည်းဆုံး ၃ နေရာ ၀င်ရောက်ယှဉ်ပြိုင်မှု ပြုနိုင်၊ မပြုနိုင် ဆိုတဲ့စကားရပ်ကို ထည့်သွင်း ရှင်းလင်းလိုက်တယ်။ နိုင်ငံရေးအကျဉ်းသား(ဟောင်း) တွေကို နိုင်ငံရေးပါတီများမှာ ၀င်ရောက်ခွင့်မရနိုင်အောင် ကန့်သတ်ထားတာတွေကို ပြင်ဆင်လိုက်တယ်။ အဲဒီ ပြင်ဆင်မှုတွေနဲ့ ပတ်သက်ပြီး ၂၀၁၀ ရွေးကောက်ပွဲနဲ့ လက်ရှိလွှတ်တော်ပြင်ပမှာ ရပ်တည်နေတဲ့ ဒေါ်အောင်ဆန်းစုကြည် ခေါင်းဆောင်တဲ့ အင်န်အယ်ဒီပါတီအနေနဲ့ အဆိုပါဥပဒေနဲ့အညီ ပါတီမှတ်ပုံတင်ရန်၊ လာမည့် ကြားဖြတ်ရွေးကောက်ပွဲကို ၀င်ရန်နဲ့ ၂၀၀၈ အခြေခံဥပဒေကို လေးစားလိုက်နာမှုများကို ရင်ဆိုင်ရန် ဆွေးနွေးဆုံးဖြတ်ကြဖို့ လာမည့် နိုဝင်ဘာ ၁၈၊ သောကြာနေ့ကို ပါတီခေါင်းဆောင်များအသီးသီးနဲ့ အစည်းအဝေးကျင်းပမယ်ဖြစ်တယ်လို့ သိရပါတယ်။ ဒါကြောင့် ယမန်နေ့က ဆရာဦးဝင်းတင်နဲ့ မေးမြန်းခဲ့သည်များကို တင်ဆက်လိုက်ပါတယ်။
မေး။။၂၀၁၀ မတ်လ ၈ ရက်နေ့လောက်က ရွေးကောက်ပွဲဥပဒေထွက်လာခဲ့တုန်းက အင်န်အယ်ဒီမှာ စီအီးစီတွေ အစည်းအဝေးထိုင်ချိန်နဲ့ တိုက်ဆိုင်ခဲ့တယ်။ အဲသည်တုန်းက တခါတည်း ဆုံးဖြတ်ခဲ့တာ ရှိသလားဆရာ။
- မရှိပါဘူး။ ဘယ်သူမှလည်း သေချာ မသိကြသေးဘူး။ ဘယ်သူမှ မဆွေးနွေးနိုင်ကြဘူး။ နောက်တပတ်ဖြစ်တဲ့ မတ် ၁၅ ရက်နေ့ကျမှ အရေးပေါ်ဆွေးနွေးနိုင်ခဲ့တယ်။
မေး။။ အဲသည်နောက် ၂၀၁၀ မတ် ၁၅ နောက်ပိုင်းမှာ ပါတီက ကန့်ကွက်သူမရှိတဲ့ ဆုံးဖြတ်ချက်နဲ့ ၂၀၁၀ ရွေးကောက်ပွဲကို သပိတ်မှောက်ခဲ့တယ်။ ပါတီကို ထပ်မံမှတ်ပုံမတင်ခဲ့ဘူး။ အဲသည်တုန်းက ဆရာတို့က ပြည်သူလူထုရဲ့ထောက်ခံမှုကို ရရှိထားတဲ့ နိုင်ငံရေးအင်အားစုကြီးဖြစ်တယ်လို့ သဘောထားပြောဆိုပြီးတော့ ရပ်တည်ခဲ့တယ်။ တရားဝင်ပါတီတို့ တရားမ၀င်ပါတီတို့လို့တောင်မှ မသုံးနှုန်းတော့ဘူး။ အဲသလို ရပ်တည်ခဲ့တာတွေကနေ တဆင့်ပြီး တဆင့် အခုလိုမျိူး တဖက်က စစ်အုပ်စုနဲ့ လက်ရှိကြံ့ဖွံ့အစိုးရအဖွဲ့တွေနဲ့ တွေ့ဆုံဆွေးနွေးမှုတွေဆီ ဦးတည်နိုင်ခဲ့တယ်လို့ ပြောလို့ ရမလားဆရာ။
- ပြောနိုင်ပါတယ်။ ပါတီဟာ အဲသည်တုန်းကတည်းက တရားမ၀င်ပါတီအဖြစ်နဲ့ ရပ်တည်ခဲ့ကြတယ်။ မြေအောက်လည်း မသွားဘူး၊ လက်နက်လည်း မကိုင်ဘူး။ လူထုတရပ်လုံးကလည်း ပါတီနဲ့ အတူတူရပ်တည်ခဲ့ကြတဲ့အတွက် အဲသည်တုန်းကတည်းက အစိုးရက ဘာမှ မလုပ်နိုင်ခဲ့ဘူး။ အဲသည်ကတည်းက ရပ်တည်ချက်မှန်လို့၊ မူပေါ်မှာ ရပ်လို့ လူထုရဲ့ နိုင်ငံရေးအင်အားစုကြီးအဖြစ် အောင်မြင်မှုတွေ ရခဲ့တယ်။
မေး။။ ဟိုလွန်ခဲ့တဲ့ ၂၀၁၀ မတ်လမှာ ကျနော်တို့ မေးခဲ့သလိုပေါ့လေ။ ၂၀၁၀ ရွေးကောက်ပွဲနဲ့ ဥပဒေတွေကြောင့် အင်န်အယ်ဒီဟာ ဟိုးတုန်းက လွတ်လပ်ရေးခေတ်ဦးကာလ ဖဆပလကြီး ၂ခြမ်းကွဲသလို အန်အယ်ဒီဟာ ကွဲမှာလားလို့ မေးခဲ့တော့၊ ဆရာတို့က မကွဲပါဘူးလို့ ပြောခဲ့တယ်။ ပါတီဟာ အဲသည်ကာလကို တစုတစည်းတည်း ရပ်တည်ပြီး ရင်ဆိုင်ခဲ့တယ်။ အခုအချိန်မှာလည်းပဲ လက်ရှိအစိုးရဖက်က ပြုပြင်ပြောင်းလဲမှုတွေအရ ပါတီအနေနဲ့ တရားဝင်မှတ်ပုံတင်ဖို့ အခြေအနေကို ရောက်လာပြီလို့ အများက ပြောနေကြတယ်။ အဲသည်နေရာမှာ ဆရာတို့က အင်န်အယ်ဒီပါတီကြီးကို ၉၀ရွေးကောက်ပွဲဆိုတာနဲ့အတူ ထားရစ်ခဲ့ပြီး ပါတီအသစ် လူအသစ်တွေနဲ့ ရင်ဆိုင်ကြလိမ့်မယ်တော့ မဟုတ်ဘူးလို့ ထင်ပါတယ်။
- အဲလိုမျိူး မဟုတ်ပါဘူး။ အင်န်အယ်ဒီပါတီဟာ ပြည်သူလူထုနဲ့အတူ ရပ်တည်တဲ့ နိုင်ငံရေးအင်အားစုဖြစ်တယ်။ ကျနော်တို့က နိုင်ငံရေးအခြေအနေတွေကို တစုတစည်းတည်း ရပ်တည်ပြီး ရင်ဆိုင်သွားမှာ ဖြစ်တယ်ဆိုတာက သေချာပါတယ်။ အဲသည်လိုပဲ ကျနော်တို့တွေ နှစ်ပေါင်း ၂၀ ကျော် ရပ်တည်ခဲ့ပြီး ဖြစ်တယ်။ အဲသည်အတွက် အင်န်အယ်ဒီဟာ မိမိရပ်တည်ချက်အတိုင်း၊ မူအတိုင်း ဆက်လက်ပြီး စုစုစည်းစည်း သွားကြမှာဖြစ်တယ်လို့ ပြောနိုင်ပါတယ်။
အဲသည်မှာ ကျနော်တို့က မြေပေါ်မှာ ရပ်တည်နေတဲ့ နိုင်ငံရေးပါတီတရပ်ဖြစ်တဲ့အတွက် မှတ်ပုံတင်ဖို့ အခြေအနေရှိလာတယ်လို့ ဖြစ်လာတယ်လို့ ပြောရင်ရပါတယ်။ ရွေးကောက်ပွဲ ၀င်ဖို့ဆိုတာကတော့ အခုအချိန်မှာ ကြားဖြတ်ရွေးကောက်ပွဲမှာ အနည်းဆုံး စတိဝင်မလား မ၀င်ဘူးလားဆိုတာ စဉ်းစားကြရမယ့် အချက်တခု ရှိနေတာပေါ့ကွာ။
နောက်ပြီးတော့လည်း လက်ရှိလွှတ်တော်ခေါင်းဆောင်တွေကနေပြီးတော့ ၉၀ရွေးကောက်ပွဲရလဒ်တွေကို အသိအမှတ်ပြုပါတယ်တို့ ဘာတို့ ထုတ်ပြောလာတယ် ဆိုတာကလည်း ဘယ်လိုအတိုင်းအတာနဲ့ ပြောနေတာလည်းဆိုတာကို ပြန်ကြည့်ကြရမယ်လေ။ လွှတ်တော်ကခေါင်းဆောင်တွေက ထုတ်ပြောတယ်ဆိုတာ ကျနော်တို့တောင်းဆိုနေတဲ့ ၉၀ရွေးကောက်ပွဲကို တနည်းနည်းနဲ့ အသိအမှတ်ပြုရမယ်ဆိုတဲ့ အချက်ကို ပြောနေတာလား၊ ဒါက တရားဝင်ရဲ့လား၊ လုံလောက်သလား၊ လွှတ်တော်မှာ တင်ပြပြီး ထုတ်ပြန်ဖို့ လိုသလား စတာတွေက ဆွေးနွေးစရာ အချက်တွေ ဖြစ်တယ်လို့ ပြောနိုင်တယ်။
မေး။။ ကျနော်တို့ မေးချင်တာကတော့ ဆရာရယ်၊ ၁၉၉၀ ရွေးကောက်ပွဲကို အသိအမှတ်ပြုလိုက်တယ်ဆိုရင် အင်န်အယ်ဒီပါတီနဲ့ မဟာမိတ်တွေက အဲသည်ရွေးကောက်ပွဲကနေ ပြည်သူတွေက ရွေးချယ်တင်မြှောက်ခြင်း ခံလိုက်ရတဲ့ လွှတ်တော်ကိုယ်စားလှယ်တွေနဲ့ ပါတီတွေဖြစ်တယ်ဆိုတာပါ တပါတည်း အသိအမှတ်ပြုသလိုဖြစ်သွားတယ်။ သို့သော် သူတို့တွေရဲ့ လွှတ်တော်ခေါ်ဆိုနိုင်ခွင့်တွေ၊ အစိုးရတရပ်ဖွဲ့စည်းနိုင်ခွင့်တွေ မရရှိခဲ့ကြဘူး။ သူတို့ကို ကျော်လွန်ပြီးတော့ အခုကျတော့ ၂၀၁၀ ရွေးကောက်ပွဲတခုနဲ့ အခု ကြံ့ဖွံ့လွှတ်တော်တွေ အစိုးရတွေ ပေါ်ပေါက်လာတယ်။ ဒါကြောင့် အခုလက်ရှိ အစိုးရနဲ့ လွှတ်တော်က အဲသည်အပေါ်မှာ တစုံတရာ ထုတ်ပြန်ဖို့ လိုမယ် မဟုတ်ဘူးလား လို့ ကျနော်တို့က မေးခွန်းထုတ်နေကြတယ် ဆရာ။
- အဲဒါတွေက ပြောစရာတွေ အများကြီး ရှိတာပေါ့။ ဒါပေမယ့်လည်း အခုအချိန်မှာ ပြင်ဆင်မှုတွေလုပ်ပေးလာတာတွေတော့ ရှိပါတယ်။ ဒေါ်အောင်ဆန်းစုကြည်ကို ပါတီကနေ ထုတ်ပစ်ရမယ်လို့ ပြောခဲ့တာတွေ ရုတ်သိမ်းလိုက်တယ်။ လက်ရှိအခြေခံဥပဒေကို လေးစားလိုက်နာရမယ်လို့ ပြောင်းပေးတယ်။ ဥပဒေဆိုတာကလည်း ဘာပဲဖြစ်ဖြစ် လေးစား လိုက်နာရမယ်ဆိုတာ the law ပဲလေ။ ဒါကြောင့် လက်ခံနိုင်စရာ ရှိတယ်လို့ ပြောနိုင်တယ်လေ။ ရွေးကောက်ပွဲကို စတိပဲဖြစ်ဖြစ် ၀င်ဖို့ဆိုတာကတော့ ရွှေဂုံတိုင်ကြေညာချက်ထဲမှာ အခြေခံဥပဒေကို ပြင်ဆင်ပေးရန်တို့၊ နိုင်ငံရေးအကျဉ်းသားတွေ ပြန်လွှတ်ပေးရန်တို့ ပါနေတော့ အခုအခြေအနေမှာက ဒါတွေက အပြည့်အ၀ မဖြစ်သေးဘူးလို့ ပြောလို့ရတယ်။ သမ္မတကြီး ဦးသိန်းစိန်က အခြေခံဥပဒေကို လိုအပ်ရင် ပြင်ဆင်ကြမယ်လို့ ပြောဆိုတာ ရှိသော်လည်း တကယ်တမ်း လွှတ်တော်မှာ မမြင်ရသေးဘူး။ နိုင်ငံရေးအကျဉ်းသားလွှတ်တာကလည်းပဲ နည်းနည်းပဲ ရှိသေးတယ်။ ဒါတွေကိုလည်း စဉ်းစားစရာ ဖြစ်နေတယ်။
မေး။။ မှတ်ပုံတင်ခြင်းက တပိုင်း၊ ရွေးကောက်ပွဲဝင်ခြင်းက တပိုင်းလို့ ဖြစ်နေတာပေါ့ဆရာ။
- အဲဒါကို ပတ်ဝန်းကျင်မှာလည်း ပြောဆိုဆွေးနွေးနေကြတာတွေ ရှိတာပေါ့။ မှတ်ပုံပဲတင်ကြမယ် ဆိုတာက တပိုင်း၊ မှတ်ပုံတင်တာနဲ့ ရွေးကောက်ပွဲဝင်တယ်ဆိုတာ တဆက်တည်းဖြစ်တယ်၊ တခါတည်း ဆက်စပ်စဉ်းစားရမယ်လို့ ပြောကြတာလည်း တပိုင်းပေါ့ကွာ။ ရွေးကောက်ပွဲဝင်ခြင်းဟာ အခြေခံဥပဒေအောက်ကို ၀င်ပြီးတော့ လွှတ်တော်ထဲကို ၀င်တာဖြစ်တယ်လို့ စဉ်းစားကြတာလည်း တပိုင်း။ ၃ မျိုးရှိတယ် လိ်ု့ပြောရင်ရတယ်။ ၁ မျိုးကတော့ မှတ်ပုံတင်ခြင်းနဲ့ ရွေးကောက်ပွဲဝင်ခြင်းကို ခွဲခြားပြီး စဉ်းစားမယ့်ဟာ ရှိမယ်။ နောက် ၁ပိုင်းကတော့ ဒေါ်အောင်ဆန်းစုကြည်က ခုချိန်မှာ အစိုးရနဲ့ ပူးပေါင်းဆောင်ရွက်နေတဲ့အချိန်မှာ ဒေါ်အောင်ဆန်းစုကြည်ကိုယ်တိုင်က တခါတည်း ရွေးကောက်ပွဲဝင်ပြီးတော့ လွှတ်တော်ထဲကနေ လုပ်ဆောင်စေချင်တဲ့ သဘောထားရှိတဲ့သူတွေကတော့ မှတ်ပုံတင်ခြင်းကို ရွေးကောက်ပွဲဝင်တာနဲ့ တပါတည်း ဆုံးဖြတ်မယ်လို့ စဉ်းစားတဲ့ အပိုင်းလည်း ရှိမှာပေါ့ကွာ။ နောက်တပိုင်းကတော့ ပါတီကို မှတ်ပုံတင်သော်လည်း လက်ရှိအခြေခံဥပဒေကို ခေါင်းလျိူဝင်ရမယ့် လွှတ်တော်တက်ဖို့အတွက်တော့ ရွေးကောက်ပွဲမ၀င်နိုင်ဘူးလို့ စဉ်းစားတာကလည်း တပိုင်း ရှိနိုင်တယ်လို့ စဉ်းစားရင် ရမယ် ထင်ပါတယ်။
မေး။။ အဲသည်လို အပိုင်းတွေရှိသော်လည်း ဆွေးနွေး ငြင်းခုံ စဉ်းစားကြတာတွေရှိသော်လည်း အင်န်အယ်ဒီဟာ အစိတ်စိတ် အပိုင်းပိုင်း အကွဲကွဲ အပြားပြားနဲ့ ဖြစ်လာလိမ့်မယ် မဟုတ်ဘူးလို့ ပြောရင် ရမလားဆရာ။
- ရပါတယ်။ ဟိုးလွန်ခဲ့တဲ့ ၂၀၁၀ မတ်လမှာတုန်းက ကျနော်တို့ပါတီကအင်အားစုတွေတရပ်လုံးက ၂၀၁၀ ရွေးကောက်ပွဲကို ရင်ဆိုင်ဖို့ ဆုံးဖြတ်ခဲ့စဉ်က စနစ်တကျ စည်းကမ်းရှိရှိ ညီညီညွတ်ညွတ်နဲ့ တစုတစည်းတည်း ဆုံးဖြတ်နိုင်ခဲ့သလိုမျိူး အခုလည်းပဲ ဒီလိုပဲ ကျနော်တို့တတွေက ရင်ဆိုင်ကြမယ်၊ ဆုံးဖြတ်ကြမယ်၊ လိုက်နာကြမယ်ဆိုတာကို ပြောနိုင်ပါတယ်။ အဲသည်တုန်းက ဒေါ်အောင်ဆန်းစုကြည်ကိုယ်တိုင်က နေအိမ်အကျယ်ချူပ်ကျနေခဲ့တယ်။ အခုအချိန်မှာကျတော့ ဒေါ်အောင်ဆန်းစုကြည်ကိုယ်တိုင်က ရှေ့ထွက်ပြီး ဦးဆောင်မှုပေးနေတဲ့အချိန်ဖြစ်တယ်။ အဲလို ပြောနိုင်ပါတယ်။
မေး။။ ဟုတ်ကဲ့ပါဆရာ။ တဆက်တည်းပဲ မနေ့က အကျဉ်းထောင်ထဲမှာ နှစ်ရှည်ကျနေတဲ့ နိုင်ငံရေးအကျဉ်းသူ၊ အင်န်အယ်ဒီပါတီဝင် မဏီက ပြင်ပက ရဲဘော်တွေ၊ မိတ်ဆွေတွေဆီ ထောင်ထဲက ပေးစာလေးတခု ပို့ပါတယ်။ ကျနော်တို့ မိုးမခမှာ တင်ထားတယ်။ သူကတော့ အတိုချူံးပြောရင် အန္တရာယ်ကင်းဖို့၊ နိုင်ငံရေးပါးနပ်ဖို့၊ စည်းလုံးညီညွတ်ကြဖို့နဲ့ ပန်းတိုင်တူပြီး နည်းနာကွဲနေမယ်ဆိုရင် ခွန်အားတွေ နည်းမယ်လို့ ပြောထားပါတယ်။ အဲသည်ပန်ကြားစာလေးကို ဆရာကို တင်ပြပါတယ် ဆရာ။
- ကောင်းပါတယ်။ အဲသည်လိုကြားရတာ ၀မ်းသာပါတယ်။ ကျနော်တို့တွေက စနစ်တကျနဲ့ စည်းကမ်းတကျနဲ့ ညီညီညွတ်ညွတ် ရင်ဆိုင်ကြမယ် ဆိုတာကို တိုက်တွန်းနေပါတယ်။ ကိုဇာဂနာတို့၊ ကိုစိုးထွန်းတို့၊ ၈၈ မျိူးဆက်တွေ၊ လူငယ်မျိူးဆက်သစ်တွေကိုလည်း တညီတညွတ်တည်း လုပ်ကြရမှာပဲလို့ တိုက်တွန်းနေတာပါပဲ။ သဘောထားတွေ အယူအဆတွေကလည်း ကွဲပြားတာတော့ ရှိကြမှာပဲ။ နားလည်မှုကို တည်ဆောက်ကြရမှာပဲ။ လှေလှော်နေကြသလိုမျိူးပေါ့လေ။ အားလုံးက တည့်မတ်အောင် ထိန်းသိမ်းပေးနေရတယ်လို့ ပြောချင်တယ်။
မေး။။ အခုလိုမျိူး အပြောင်းအလဲမှာ ကျနော်တို့က ပြောချင်တာတခုကတော့ အစတုန်းက ဒေါ်စုလွတ်လာပြီးတော့ အင်န်အယ်ဒီနဲ့ ဒေါ်စုရဲ့ လှုပ်ရှားမှုတွေကို ကြံ့ဖွံ့အစိုးရရဲ့ ပြည်ထဲရေးကနေ ကန့်သတ်ဖို့ ကြိုးစားတယ်။ ဒေါ်စုက အစိုးရနဲ့ စကားပြောချင်တယ်လို့ တောင်းဆိုတယ်။ နောက်တော့ ဦအောင်ကြည်နဲ့ တွေ့ဆုံတယ်။ အဲသည်တုန်းကလည်း ဒေါ်စုကိုပဲ အသိအမှတ်ပြုပြီး ခေါ်တာဖြစ်တယ်။ ပါတီကို ထည့်သွင်းပြောဆိုခြင်း မရှိခဲ့ဘူး။ နောက် အားလုံးက၀ိုင်းပြီးပြောဆိုကြလို့ ပါတီခေါင်းဆောင်အနေနဲ့ ဒေါ်စုကို တွေ့ဆုံတာ၊ ပါတီနဲ့ပတ်သက်ပြီး လက်ခံတယ် ဘာညာ ဖြစ်လာတယ်လေ။ အခုကျတော့ ပါတီနဲ့ ဒေါ်စုကို လက်ရှိအစိုးရက အရေးတယူလက်ခံပြီး မှတ်ပုံတင်တာတွေ ဘာတွေ လုပ်လာသော်လည်း အစိုးရနဲ့ အာဏာပိုင်အဆင့်ဆင့်က ပါတီရဲ့ လူကြီး၊ လူငယ်၊ ပါတီဝင်စတဲ့ အဆင့်ဆင့်ကို အသိအမှတ်ပြုပြီး ဆက်ဆံတာတွေ မမြင်ရသေးဘူး။ ဖြစ်သင့်တာက လက်ရှိအစုိုးရ၊ လွှတ်တော်နဲ့ အာဏာပိုင်တွေဟာ မဲဆန္ဒရှင်ပြည်သူတွေ၊ နိုင်ငံရေးအကျဉ်းသားတွေ၊ မိသားစုတွေ၊ တိုင်းရင်းသားတွေအားလုံးကို သာတူညီမျှ အရေးထားပြီး ဆက်ဆံရမယ်၊ သူတို့ဆန္ဒတွေကို အသိအမှတ်ပြုရမယ်ဆိုတဲ့ အဆင့်တွေ ဖြစ်ထွန်းလာဖို့ လိုသေးတယ်လို့ တင်ပြလိုပါတယ် ဆရာ။
- ဟုတ်ပါတယ်။ ဒါကို ကျနော့်အနေနဲ့ လက်ခံပါတယ်။
မေး။။ ဒီမေးခွန်းကတော့ နည်းနည်းရှည်တယ်။ ခွင့်ပြုပါဆရာ။ အခုက နိုင်ငံရေးအပြောင်းအလဲကာလတခုကို သွားနေတဲ့အချိန်လို့ ပြောကြတယ်ဆရာ။ ကျနော်ကတော့ ၁၉၆၂ စစ်တပ်အာဏာမသိမ်းခင် ဖဆပလကြီးကွဲခဲ့တာကို မြင်ယောင်ခဲ့တယ်။ ဒါကို ဆရာ့ကို မေးခဲ့ဘူးတယ်။ အခု မြင်ယောင်တဲ့ဖြစ်ရပ်တခုကတော့ ၁၉၇၄ မှာ စစ်တပ်က ဆိုရှယ်လစ်တပါတီ အခြေခံဥပဒေကို အတည်ပြုခဲ့တဲ့ အချိန်ကို ပြန်စဉ်းစားမိတယ်။ အဲသည်မှာ စစ်အာဏာရှင်တဖြစ်လည်း တပါတီအာဏာရှင်နိုင်ငံရေးအောက်မှာ အတိုက်အခံနိုင်ငံရေးအင်အားစုတွေရဲ့ ရပ်တည်မှုတွေ အားနည်းကုန်တယ်၊ လျော့ကျတယ်၊ ပျောက်ပျက်ကုန်တာတွေရှိတယ်။ စာပေ အနုပညာနဲ့ ဘာသာရေး၊ လူမှုရေးလွတ်လပ်ခွင့်တွေ ဖိနှိပ်ခံခဲ့ရတယ်။ ဥပမာ ဆရာတို့ကိုယ်တိုင် ဟံသာဝတီသတင်းစာ အယ်ဒီတာအဖြစ်က ဖယ်ရှားခံရတယ်။ ကိုကိုးကျွန်းပြန်တွေ နိုင်ငံရေးသမားတွေကို လူထုနဲ့ ပြန်လည်ဆက်စပ်မှုမရှိအောင် အာဏာရှင်တွေက ကန့်သတ်တာတွေ၊ ဖိနှိပ်ထားတာတွေ လုပ်ခဲ့တယ်။ အဲသည် ၇၅၊ ၇၆ ကာလတွေမှာ ကျောင်းသား၊ အလုပ်သမားနဲ့ ဦးသန့်အရေးအခင်းတွေ ဖြစ်ပွားခဲ့သော်လည်း စစ်တပ်က ချေမှုန်းဖျက်ဆီးပစ်ခဲ့လို့ ၁၉၈၈ အရေးတော်ပုံကြီး မပေါ်ခင်စပ်ကြားမှ နိုင်ငံရေးအင်အားစုတွေ မျိုးဆက်တွေ အဆက်ပြတ်ခဲ့ရတာကို ပြန်တွေးမိတယ်။ အခုအချိန်မှာလည်းပဲ မတော်တဆပေါ့လေ၊ အခန့်မသင့်လို့ပဲ ထားပါတော့ ကျနော်တို့တတွေရဲ့ အတိုက်အခံနိုင်ငံရေးလှုပ်ရှားမှုတွေ၊ လွတ်လပ်ခွင့်တွေ၊ လှုပ်ရှားခွင့်တွေဟာ ပုံသဏ္ဍန်အရ အားနည်းကုန်တာ၊ ပြောင်းလဲ လျော့နည်းကုန်တာတွေ ဖြစ်မလာဘူးလို့ ပြောနိုင်သလား။
- ကျနော် ယခင်ကအင်တာဗျူးတွေမှာ ပြောခဲ့ဘူးပါတယ်။ ကျနော်တို့က နိုင်ငံရေးအကျဉ်းသားတွေ၊ ထောင်ထွက်တွေ၊ ၈၈ မျိူးဆက်တွေ၊ မျိုးဆက်သစ် လူငယ်တွေ ကျောင်းသားတွေဟာ မိမိတို့ရဲ့ မူလနိုင်ငံရေးဘ၀တွေကို ဆက်လက်တည်ဆောက်ကြရမယ်။ ပတ်ဝန်းကျင်ကလူတွေကလည်း ၀ိုင်းဝန်းအားပေး ထောက်ခံမှုတွေ ပြုရမယ်လို့ ပြောဖူးတယ်။ ကျနော်ကတော့ ခင်ဗျားပြောသလိုမျိူး မပြောချင်ဘူး။ အခုအချိန်မှာ မိမိရဲ့ ယုံကြည်ချက်နဲ့ တည်ဆောက်ထားတဲ့ နိုင်ငံရေးဘ၀ကို စွန့်လွှတ်ပြီးတော့ အခြားဘ၀တခု ထူထောင်တာမျိုးထက် ဆက်လက်ပြီး နိုင်ငံရေးပုံသဏ္ဍန်ကို ဖြစ်ထွန်းလာအောင် ထူထောင်ကြရမယ့် အချိန် ဖြစ်တယ်လို့ ပြောနေတာ ဖြစ်တယ်။ ၁၉၇၄ ခုနှစ်နောက်ပိုင်းက ပုံသဏ္ဍန်ကို ပြောတာထက်၊ ကျနော်ပြောချင်တဲ့ ပုံသဏ္ဍန်ကတော့ – ကိုလိုနီခေတ် ၁၉၃၈ နောက်ပိုင်း၊ ၁၃၀၀ ပြည့်အရေးတော်ပုံကာလနောက်ပိုင်းမှာ သခင်အောင်ဆန်းတို့ သပိတ်မှောက်ကျောင်းသားမျိုးဆက်တွေဟာ သခင်ကိုယ်တော်မှိုင်းတို့ရဲ့ ဒို့ဗမာအစည်းအရုံးထဲကို ခြေစုံပစ်ဝင်ပြီးတော့ အမျိုးသားလွတ်မြောက်ရေးလှုပ်ရှားမှုကြီးထဲကို နိုင်ငံရေးနယ်ပယ်ထဲမှာ ၀င်ရောက်လာတာမျိုးလိုပဲ ကျနော်က ပြောချင်တယ်။ ယခုအချိန်မှာ အားလုံးကို ဒီလိုပဲ တိုက်တွန်းပါတယ်။ ယခုအချိန်မှာက နိုင်ငံရေးအကြောင်းအရာတွေက ပျောက်ကွယ်သွားတာ မဟုတ်ပါဘူး။ နိုင်ငံရေးအကြောင်းအရာတွေ လုပ်စရာတွေ အများကြီး ဆက်လက်ရှိနေတယ်။ ကျနော်တို့ရဲ့ နိုင်ငံရေးပုံသဏ္ဍန်တွေကို ဆက်လက်ထုတ်ဖော်ရမယ်၊ ထူထောင်တည်ဆောက်ကြရမယ်လို့ ပြောနေတာဖြစ်ပါတယ်။ ဒါကို မိသားစုတွေ ပတ်ဝန်းကျင်တွေက အားပေးရမယ်။ ၀န်းယံတည်ဆောက်ပေးကြရမယ်လို့ ပြောချင်ပါတယ်။
မေး။။ ကျေးဇူးတင်ပါတယ် ဆရာ။
No comments:
Post a Comment