Monday, September 2, 2013

၈၈ ခုနှစ် လူထုလှုပ်ရှားမှု နှစ်ဆယ့်ငါးနှစ်ပြည့် အခမ်းအနားက နိုင်ငံရေးသမိုင်းအတွက် အရေးကြီးတဲ့ သင်ခန်းစာများ ရယူနိုင်တဲ့ ကိစ္စရပ် တစ်ခုဖြစ်တယ်လို့  ပြောရင် ၂၀၀၇ ရွှေဝါရောင်သံဃာလှုပ်ရှားမှုကရော။

Nik Nayman အစ်ကိုနစ်

“ကျင်းပခဲ့တဲ့ ၈၈ ခုနှစ် လူထုလှုပ်ရှားမှု နှစ်ဆယ့်ငါးနှစ်ပြည့် အခမ်းအနားဟာဆိုရင် ကျွန်တော်တို့  နိုင်ငံရေးသမိုင်းအတွက် အရေးကြီးတဲ့ သင်ခန်းစာများ ရယူနိုင်တဲ့ ကိစ္စရပ် တစ်ခုဖြစ်ပါတယ်။ ဒီလို ကျင်းပနိုင်ခြင်းဟာ မိမိတို့  နိုင်ငံရေးဖြစ်စဉ်မှာ ယခင်ကာလများက မရရှိဖူးသေးတဲ့ “သဘောထား မတူညီသူများ အတူလက်တွဲ လုပ်ဆောင်နိုင်တယ်” ဆိုတဲ့ နိုင်ငံရေးယဉ်ကျေးမှုတစ်ရပ်ကိုလည်း တက်လှမ်းနိုင်ခဲ့ခြင်းဘဲ ဖြစ်ပါတယ်။ ဒီ တက်လမ်းမှုကို ကျွန်တော့်အနေနဲ့  အသိအမှတ်ပြု အလေးထားကြောင်းကိုလည်း တစ်ဆက်တည်း ပြောကြားလိုပါတယ် - လို့  သိန်းစိန်က ယခုလ စက်တင်ဘာလ (၁) ရက်နေ့ က ပြောကြားခဲ့ပါတယ်။

သိန်းစိန်ရဲ့  ပြောစကားတွေက သာမန်အားဖြင့် ကြည့်ရင် ပြည်သူဘက်ကိုဘဲ ပါသလို၊ ပြုပြင်ပြောင်းလဲရေးအတွက် အပြုသဘောနဲ့ ဘဲ ပြောသလို၊ တိုင်းပြည်နဲ့  လူမျိုးအတွက် စေတနာတရား ထက်သန်သလို၊ ဖြစ်ပျက်ပြီးခဲ့သမျှအပေါ် သင်ခန်းစာယူပြီး နောင်တဘဲ ရသလို ထင်ရပေမယ့် သိန်းစိန်ရဲ့  ပြောသမျှစကားအားလုံးဟာ အဓိပ္ပါယ်နှစ်ခွနဲ့  တကယ်တမ်းကျတော့ ပြည်သူကို နှစ်သိမ့်သရောင်နဲ့  ပျော့ပျော့လေးနဲ့  နံတဲ့ ကြောင်ချီးလိုဘဲ အာဏာရှင်ပီပီ လိုရာဆွဲယူတဲ့ သိန်းစိန်ရဲ့  ပြောစကားပုံစံတွေပါဘဲ။

“ကျင်းပခဲ့တဲ့ ၈၈ ခုနှစ် လူထုလှုပ်ရှားမှု နှစ်ဆယ့်ငါးနှစ်ပြည့် အခမ်းအနားဟာဆိုရင် ကျွန်တော်တို့  နိုင်ငံရေးသမိုင်းအတွက် အရေးကြီးတဲ့ သင်ခန်းစာများ ရယူနိုင်တဲ့ ကိစ္စရပ် တစ်ခုဖြစ်ပါတယ်” လို့  သိန်းစိန်ပြောခဲ့တယ်။ ဘယ်လိုများ နိုင်ငံအတွက် သင်ခန်းစာများ ရယူနိုင်တာပါလည်း။ တကယ်တမ်းမှာတော့ သိန်းစိန်တို့  အာဏာရူးတွေဟာ ၈၈ အရေးတော်ပုံကြီးက စလို့  နေ၀င်းရဲ့ တစ်ပါတီ အာဏာရှင်စနစ် ပြုတ်ကျပြီး အုပ်ချူပ်မှုယန္တယား ပြိုလဲခဲ့ရတာကို သင်ခန်းစာယူပြီး ဒီလို ထပ်ဖြစ်မခံရလေအောင် လမ်းပြမြေပုံ (၇) ချက်ကို ဆွဲ အမျိုးသားညီလာခံကြီးကို နှစ်ပေါင်းမြောက်မြားစွာ ကျင်းပ ၂၀၀၈ ခုနှစ် ဖွဲ့ စည်းပုံကို တစ်ဘက်သတ်ပြဌာန်း ပြီးတော့ ယူနီဖောင်းချွတ် အရပ်ဝတ် ၀တ်ပြီး ဒီမိုကရေစီအစိုးရ အယောင်ဆောင်တဲ့အထိ လုပ်တာပါဘဲ။ သိန်းစိန်ပြောတဲ့ သင်ခန်းစာရယူတယ်ဆိုတာ အာဏာရှင်စနစ်ကို ဘယ်လို ပိုပြီးခိုင်မာအောင် ၁၉၈၈ ကာလအတွင်းကနေ ယခုထိ ဖြစ်ပျက်ခဲ့တာတွေကို သင်ခန်းစာယူပြီး အာဏာတည်မြဲရေးအတွက် လုပ်တာပါဘဲ။

“သဘောထား မတူညီသူများ အတူလက်တွဲ လုပ်ဆောင်နိုင်တယ်” ဆိုတဲ့ သိန်းစိန်ရဲ့  ပြောစကားက သာမန်အားဖြင့် ကြည့်ရင် အားလုံးစုံညီ ဆွေးနွေးအဖြေရှာပြီး သဘောထားတွေ တူညီကာ အပြန်အလှန် မှားယွင်းချက် အားနည်းချက်တွေ ပြင်ဆင်ကြကာ အတူလက်တွဲလုပ်ကြတယ့်သဘောလိုလို ထင်စေနိုင်ပေမယ့် တကယ်တမ်း ဖြစ်ပေးနေတဲ့ နိုင်ငံရေးအခြေအနေအရကြည့်ရင် သိန်းစိန်တို့ ဘက်က သမိုင်းကြောင်းမှာ မှားယွင်းခဲ့မှုတွေကို လုံးဝ ၀န်ခံတာမျိုး မရှိပေ၊ အုပ်ချူပ်မှုကာလတောက်လျှောက်မှာ တိုင်းပြည်အတွက် နစ်နာစေခဲ့တဲ့ အားနည်းချက်တွေကို ပွင့်လင်းမြင်သာစွာနဲ့  ပြင်ဆင်ခဲ့တာတွေ၊ မတရားမှု မမျှတမှု အနိုင်ကျင့်မှု သတ်ဖြတ်ညဉ်းဆဲမှု ဖမ်းဆီးထောင်ချမှု အစရှိတဲ့ အဓမ္မလုပ်ဆောင်မှုတွေကို ဆက်လက်ကျူးလွန်နေဆဲဖြစ်တဲ့ သိန်းစိန်တို့ ဟာ ၄င်းတို့ ရဲ့  မှားယွင်းလွန်းနေတဲ့ သဘောထားတွေကိုတော့ မပြောင်းလဲဘဲ၊ အာဏာရှင်ဆန့် ကျင်ရေးသမားများရဲ့  ပြောင်းလဲသွားသော သဘောထားများနဲ့  ချဉ်းကပ်လာတဲ့ ပူးပေါင်းဆောင်ရွက်ရေး သဘောထားများအရသာ အပေါ်ယံကြော ဟန်ဆောင် လက်တွဲလုပ်ဆောင်ပြတဲ့ “သဘောထား မတူညီသူများ အတူလက်တွဲ လုပ်ဆောင်နိုင်တယ်” ဆိုပြီး ၄င်းတို့ ရဲ့  အဓမ္မ၀ါဒီလမ်းစဉ်ကိုတော့ သဘောထား မပြောင်း အသေဆုတ်ကိုင်ထားပြီး ဆန့် ကျင်ဘက်သူများရဲ့  ပြောင်းလဲမှုကိုသာ အမြတ်ထုတ်တဲ့ ပြောစကားသာ ဖြစ်ပါတယ်။

အကယ်၍များ - ၈၈ ခုနှစ် လူထုလှုပ်ရှားမှု နှစ်ဆယ့်ငါးနှစ်ပြည့် အခမ်းအနားဟာ သိန်းစိန်ပြောသလို နိုင်ငံရေးသမိုင်းအတွက် အရေးကြီးတဲ့ သင်ခန်းစာများ ရယူနိုင်တဲ့ ကိစ္စရပ် တစ်ခုဖြစ်တယ်ဆိုရင် - မကြာခင်မှာ ရက်ပိုင်းအတွင်းမှာ ကျရောက်တော့မယ် ၂၀၀၇ ခုနှစ် ရွှေဝါရောင် သံဃာ့လှုပ်ရှားမှု နှစ်ပါတ်လည်အခမ်းအနားကို ရှစ်လေးလုံးအထိမ်းအမှတ် အခမ်းအနား ကျင်းပသလို ကျင်းပခွင့် ပေးနိုင်ပါသလားရယ်၊ ၂၀၀၇ ရွှေဝါရောင်လှုပ်ရှားမှုမှာ ရဟန်းရှင်လူပြည်သူပြည်သားတွေ တောင်းဆိုခဲ့တဲ့ တောင်းဆိုမှုတွေဟာ မြန်မာပြည် နိုင်ငံရေးသမိုင်းအတွက် အရေးကြီးတဲ့ သင်ခန်းစာများ ရယူနိုင်တယ်ဆိုတာ နားလည်လက်ခံနိုင်ပါရဲ့ သလား၊ ထို့ အတူ ၂၀၀၇ ရွှေဝါရောင်လှုပ်ရှားမှုမှာ ပါဝင်ခဲ့ကြတဲ့သူတွေနဲ့ “သဘောထား မတူညီသူများ အတူလက်တွဲ လုပ်ဆောင်နိုင်တယ်” ဆိုတဲ့ ပြောစကားအတိုင်း မှန်မှန်ကန်ကန်နဲ့  လုပ်ဆောင်ပြနိုင်ပါ့မလား၊ သိန်းစိန်တို့ ရဲ့  ရဟန်းရှင်လူပြည်သူလူထုအပေါ် ဖိနှိပ်ချုပ်ခြယ်မှုတွေကို အမှန်တကယ် သင်ခန်းစာယူ ပြောင်းလဲနိုင်ပါသလားဆိုတာ မကြခင်ကျရောက်မယ့် ရွှေဝါရောင်လှုပ်ရှားမှု နှစ်ပါတ်လည်နေ့ ရက်မတိုင်ခင်မှာ ကြားသိချင်ပါရဲ့ ။

No comments:

Post a Comment